ថៃ៖ រដ្ឋាភិបាលថៃ នឹងលើកលែងលក្ខខណ្ឌវិធានចត្តាឡីស័ករបស់ខ្លួន ចំពោះជនបរទេសទាំងឡាយណាដែលបានទទូលវ៉ាក់សាំងរួចរាល់ ហើយធ្វើដំណើរចូលមកកាន់ប្រទេសថៃតាមផ្លូវអាកាសចាប់ពីថ្ងៃទី០១ ខែវិច្ឆិកានេះតទៅ។ នេះបើយោងតាមការប្រកាសរបស់លោកនាយករដ្ឋមន្រ្តីថៃ ប្រាយុទ្ធ ចាន់អូចា តាមរយៈបណ្តាញផ្សព្វផ្សាយក្នុងប្រទេសថៃនៅថ្ងៃចន្ទម្សិលមិញនេះ។

លោកប្រាយុទ្ធថ្លែងថា៖ “ថ្ងៃនេះ! ខ្ញុំបានបញ្ជាឱ្យមជ្ឈមណ្ឌលគ្រប់គ្រងស្ថានការណ៍កូវីដ-១៩ រួមជាមួយក្រសួងសុខភាពសាធារណៈ រួមគ្នាប្រជុំពិចារណាសម្រេចនៅក្នុងសប្តាហ៍ខាងមុខ។ ចាប់ពីថ្ងៃទី០១ ខែវិច្ឆិកាតទៅ ប្រទេសថៃនឹងចាប់ផ្តើមបើកប្រទេសឡើងវិញ ដោយមិនតម្រូវឱ្យជនបរទេសធ្វើចត្តាឡីស័កឡើយ ប៉ុន្តែលក្ខខណ្ឌនេះអនុវត្តចំពោះជនបរទេសទាំងឡាយណាដែលបានចាក់វ៉ាក់សាំងរួចរាល់ និងធ្វើការចូលមកកាន់ប្រទេសថៃតាមផ្លូវអាកាស ពីប្រទេសដែលស្ថិតក្នុងបញ្ជីហានិភ័យកូវីដ-១៩ កម្រិតទាប"។

បើតាមការឱ្យដឹងជំហានដំបូងពីលោកនាយករដ្ឋមន្រ្តីថៃ យ៉ាងហោចណាស់ ១០ប្រទេសស្ថិតក្នុងបញ្ជីនៃប្រទេសស្ថិតក្នុងហានិភ័យទាបរបស់រដ្ឋាភិបាលថៃ ដែលរួមមានដូចជាចិន, អាល្លឺម៉ង់, សិង្ហបុរី, ចក្រភពអង់គ្លេស និងសហរដ្ឋអាមេរិកជាដើម ខណៈប្រទេសនានាផ្សេងទៀតនឹងត្រូវពិចារណាដាក់បញ្ចូលបន្ថែមពីថ្ងៃទី០១ ខែធ្នូតទៅ។

ទន្ទឹមនឹងនេះ លោកប្រាយុទ្ធបានបញ្ជាក់ពីលក្ខខណ្ឌមួយចំនួនបន្ថែមថា រដ្ឋាភិបាលថៃមានលក្ខខណ្ឌតែមួយប៉ុណ្ណោះ គឺទាមទារឱ្យភ្ញៀវទាំងនោះមានលទ្ធផលដោយម៉ាស៊ីន RT-PCR បញ្ជាក់ថាអវិជ្ជមានកូវីដ-១៩ ដែលចេញដោយអាជ្ញាធរសុខាភិបាលប្រទេសដើមរបស់គេ និងត្រូវធ្វើតេស្តកូវីដ-១៩ម្តងទៀតពេលមកដល់ទឹកដីថៃ។ ប្រសិនបើលទ្ធផលតេស្តអវិជ្ជមានដដែល ភ្ញៀវបរទេសទាំងអស់នឹងអនុញ្ញាតឱ្យធ្វើដំណើរកម្សាន្តគ្រប់តំបន់ទាំងអស់ដូចអ្វីដែលប្រជាជនថៃទូទៅអាចធ្វើបានដែរ។

ប៉ុន្តែយ៉ាងណាក្តី ចំពោះប្រទេសដែលមិនទាន់ទទួលបានការអនុញ្ញាត និងមិននៅក្នុងបញ្ជីសុវត្ថិភាពរបស់ថៃ ភ្ញៀវទេសចរណ៍ និងអ្នកដំណើរបរទេសទាំងនោះនៅតែតម្រូវឱ្យមានការធ្វើចត្តាឡីស័កដដែល៕